Act 14 | NAS | STEP | Teke Aikoniamiꞌnavuntuꞌkoo tenaanka pava dootuuꞌnava-koo napoꞌ tumparetuꞌ Juꞌnupoong biikanava-koo, eeꞌnoko teke teeꞌ nariꞌ aaꞌnaꞌ daankiaresioꞌ nantoong karingai masikaꞌantavauꞌ ookavitura-kooninge aaꞌning Juꞌnupoong teing Juꞌdeeaing nariꞌ dootuuꞌarikoꞌning.

Acts 14

Paulaꞌnaanka Banabasi Aikoniamiꞌnavuntuꞌ Basiareta Nkoaretuꞌnaꞌ

1 Teke Aikoniamiꞌnavuntuꞌkoo tenaanka pava dootuuꞌnava-koo napoꞌ tumparetuꞌ Juꞌnupoong biikanava-koo, eeꞌnoko teke teeꞌ nariꞌ aaꞌnaꞌ daankiaresioꞌ nantoong karingai masikaꞌantavauꞌ ookavitura-kooninge aaꞌning Juꞌnupoong teing Juꞌdeeaing nariꞌ dootuuꞌarikoꞌning. 2 Teka teke niiꞌning Juꞌnupoong-kooning Karistooꞌ masikaꞌantavaavarukoꞌninge siingoravaarima akoing noruꞌ orari-antavaaruꞌ teing baito-nupoong munteꞌkoo. 3 Teka teeꞌkoo tenaanka pankaroong otoretuꞌ teke dera-antavuresi tee minkunaa Ovoring bakaang piaa-koong, eeꞌnoko Ovoringe tee minkunaa masikee-anta-koo taaꞌniꞌantananka eeꞌnoko taꞌnimpaariiꞌnanka nkovureeꞌnaang avuretuꞌ. 4 Eeꞌnoko nantoong temono osi pankamono-kooning meuꞌ tankaampariruꞌ, aaꞌnouꞌ niiꞌning Juꞌnupoong ninka deempariruꞌ eeꞌnoko niiꞌning kara-okovuresi-nkara ninka deempariruꞌ. 5 Teketa tenang aaꞌnouꞌ Juꞌnupoong eeꞌnoko teing Juꞌdeeaing nariꞌ, biikaning ovontung ninka, tenaanka orakaꞌ nkoaarema kapange tooꞌpaarema dupisiꞌkoo mauꞌaareko taaravareta kooꞌaretuꞌ niiꞌning osinairu-koo aaꞌning-koo Liisiraꞌ eeꞌnoko Deebi, Laikoniaꞌnameensiꞌkooning osi pankeng-koo. 7 Eeꞌnoko tenairu-koo daankivuretuꞌ tee doorenang tampara.

Liisiraꞌnupoonge Paulaꞌnaanka Banabasi Kumponinka tampaaretuꞌnaꞌ

8 Teke Liisiraꞌke naning narung baꞌnanui otokoꞌnung kauꞌ doota, pontoꞌaruꞌnooꞌketa nanuarukoꞌnung. 9 Teie Paulaꞌ karoko taaravuuꞌ, eeꞌnoko Paulaꞌke naapu narung oovuma tasiꞌpura masikaꞌantavui taarevoaing-pinaꞌ noruꞌarako aaꞌnaꞌ karoma aaꞌpuuꞌ, “Deto koontari donkoniai.” 10 Eeꞌnoko deto dinkitooꞌarara donkonura nanuuꞌ.

11 Eeꞌnoko tenang nantoong karingai ooaara tee kapooꞌ Paulaꞌke nkovuuꞌnung teing deto bokiaama biikanaꞌ Laikoniaꞌnaꞌ kareaama aaꞌpauꞌ, “Tenaanka niikanaanka kumponinka tee eꞌmung siaresing naning-pinaꞌ oroꞌparesi.” 12 Eeꞌnoko teinge Banabasi Sius tampauꞌ, eeꞌnoko Paulaꞌ, kara bauko deemparako Eemis tampauꞌ. 13 Eeꞌnoko teie Sius-koong piristiꞌke, bakaang boontunava teꞌ osi pankamono-koo beꞌdoma otokoꞌ aaꞌnunge iiooꞌ tuumpura boromakaꞌnanka-koo pampurira karanaang biꞌuruꞌ osi pankamono-koo tuntoma, eeꞌnoko nantoong ninka boontunampariiꞌnaang piavorokoꞌ.

14 Eeꞌnoko tenang kara-okovuresi-nkarai Banabasi naankai Paulaꞌ oovureta tenaankai beekaning mononopaꞌnanka kurumparetuꞌning dereꞌuretuꞌ orokoarema. Eeꞌnoko teing nantoong karinga-aape kuaꞌparetuꞌ bokurema aaꞌpurema, 15 “Ee aing, aung aming-koo eeꞌ nkoverimang? Neeꞌ tenaanka naninka diiꞌpinaꞌ nariꞌ oroꞌka, diiꞌkoo doorenang tampara poꞌantavampesinaanka diiꞌ bereꞌdariiꞌnaang teing-eta aing-eta kapooꞌ tamunsiꞌning-eta Kumponing domantooꞌaape, tee eeꞌnara paning eeꞌnoko kansiꞌ nkovuuꞌ eeꞌnoko pirung ookara kapooꞌ kuung otoromaing ninka nariꞌ. 16 Tero urikavarang-koo teie tee tauraꞌpuruꞌnung ookutuning amutemuriiꞌ nantoong avitoitoi piavoroainaꞌ siompaavaꞌnaang. 17 Teka tee bane teeꞌ nkorurira teie koontoꞌ siꞌduriaꞌ taaꞌniꞌantavari, aiꞌ teie tee tampaꞌ nkorurimaung apoꞌ dovang arurima paning-eta, bateinananka ookara kapooꞌnanka tampaꞌ sinampumaing arurikooꞌ diikaang domang unaa-antarurima taamang tovange eeꞌnoko doturotu.” 18 Teeꞌ nauaareta teie aunge karai kakau bereꞌantavaaretuꞌ teing nantoong tenaanka-koo boontu-koo piavorokoꞌning.

19 Teka teing Juꞌnupoong turampaarekoꞌninge Antiokoꞌketa eeꞌnoko Aikoniamiꞌketa porora nantoong noruꞌ bereꞌantavaarioꞌ teinge Paulaꞌ kapange tooꞌpauꞌ eeꞌnoko osi-koo damaꞌdu barampaara duaꞌauꞌ booꞌparuꞌnung-pinaꞌ noruꞌaama. 20 Teka tenang Karistooꞌ sionuka tee koroai tee-anko poroioꞌ tee deto donkonura osi pankamono-koo napoꞌ tumparuꞌ, eeꞌnoko daunaꞌmung Banabasi ninka nariꞌ Deebi-aape beretuꞌ.

Paulaꞌnaanka Banabasi Toroarema Dootuuꞌnupoong Puring-antavaaretuꞌnaꞌ

21 Teketa tenang tenaankai doorenang tampara daankivurema teke Deebi-navuntuꞌkoo nantoong karinga Karistooꞌ sionuka deeng-antavaaretuꞌnung. 22 Teketa tenaanka Liisiraꞌ eeꞌnoko Aikoniamiꞌ eeꞌnoko Antiokoꞌaape toroareta puring-antavaaretuꞌ teing Karistooꞌ sionuka biikaang masikaꞌanta-koo, tautauaarema teeꞌ nariꞌ masikaꞌantavariri otorooꞌnaang eeꞌnoko aaꞌpaarema, “Bakei teing kapooꞌ mankiꞌ mmauꞌnanka kuneꞌampima Kumponing bakaang muuꞌkoo tung-koo makotumpiiꞌnaang.” 23 Eeꞌnoko tenaankai dootuuꞌnupoong-kooning urantanuka miruꞌaaretuꞌ osi kante-koo, eeꞌnoko kunsiarima unkumoariri Ovoring-koo sipaarekoꞌ masikaꞌantavaakoꞌnung-koo.

24 Teketa tenaanka Pisidia-nameensiꞌke tankinureta Pampiliaꞌnameensiꞌkoo basiaretuꞌ. 25 Eeꞌnoko tenang Peeka-namono-koo kara siraꞌpureta, Atalia-navuntuꞌaape danto beretuꞌ. 26 Eeꞌnoko teketa beekaang nko-nko opureta Antiokoꞌnamono-aape aarerie toroaretuꞌ, teꞌ eeꞌnooꞌ tutung Karistooꞌ bakanavitue Kumponing-koo sipaaretuꞌnooꞌ pakuvureeꞌnaang tee nko-nko nkovureko.

27 Eeꞌnoko tenang teꞌ basiareta tenaankai ookara dootuuꞌnupoong naroꞌ oosiaaretuꞌ eeꞌnoko sirakaꞌantavuretuꞌ ookara kapooꞌ Kumponinge nkovuuꞌning tenaanka ninka, eeꞌnoko napoꞌ teeꞌ Kumponinge taung nkovuuꞌnaꞌ teinge Juꞌdeeainge nariꞌ masikaꞌantavaavaꞌnaang. 28 Eeꞌnoko tenaanka teke pankaroong otoretuꞌ Jiisuuꞌ sionuka ninka.